Georgics

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. Absint et picti squalentia terga lacerti
  2. pinguibus a stabulis meropesque aliaeque volucres
  3. et manibus Procne pectus signata cruentis;
  4. omnia nam late vastant ipsasque volantes
  5. ore ferunt dulcem nidis immitibus escam.
  6. At liquidi fontes et stagna virentia musco
  7. adsint et tenuis fugiens per gramina rivus,
  8. palmaque vestibulum aut ingens oleaster inumbret,
  9. ut, cum prima novi ducent examina reges
  10. vere suo ludetque favis emissa iuventus,
  11. vicina invitet decedere ripa calori,
  12. obviaque hospitiis teneat frondentibus arbos.
  13. In medium, seu stabit iners seu profluet umor,
  14. transversas salices et grandia conice saxa,
  15. pontibus ut crebris possint consistere et alas
  16. pandere ad aestivum solem, si forte morantes
  17. sparserit aut praeceps Neptuno immerserit Eurus.
  18. Haec circum casiae virides et olentia late
  19. serpylla et graviter spirantis copia thymbrae
  20. floreat inriguumque bibant violaria fontem.