Eclogues

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. Nunc te marmoreum pro tempore fecimus; at tu,
  2. si fetura gregem suppleverit, aureus esto.
Corydon
  1. Nerine Galatea, thymo mihi dulcior Hyblae,
  2. candidior cycnis, hedera formosior alba,
  3. cum primum pasti repetent praesepia tauri,
  4. si qua tui Corydonis habet te cura, venito.
Thyrsis
  1. Immo ego Sardoniis videar tibi amarior herbis,
  2. horridior rusco, proiecta vilior alga,
  3. si mihi non haec lux toto iam longior anno est.
  4. Ite domum pasti, si quis pudor, ite iuvenci.
Corydon
  1. Muscosi fontes et somno mollior herba,
  2. et quae vos rara viridis tegit arbutus umbra,
  3. solstitium pecori defendite; iam venit aestas
  4. torrida, iam lento turgent in palmite gemmae.
Thyrsis
  1. Hic focus et taedae pingues, hic plurimus ignis
  2. semper, et adsidua postes fuligine nigri;
  3. hic tantum Boreae curamus frigora, quantum
  4. aut numerum lupus, aut torrentia flumina ripas.
Corydon
  1. Stant et iuniperi, et castaneae hirsutae;
  2. strata iacent passim sua quaque sub arbore poma;