Elegiae

Tibullus

Tibullus. Aliorumque carminum libri tres. Postgate, J. P. (John Percival), editor. Oxford: Scriptorum classicorum bibliotheca Oxoniensis, 1915.

  1. nec mea mortiferis infecit pocula sucis
  2. dextera nec cuiquam trita uenena dedit,
  3. nec nos sacrilegos templis admouimus ignes,
  4. nec cor sollicitant facta nefanda meum,
  5. nec nos insanae meditantes iurgia mentis
  6. impia in aduersos soluimus ora deos.
  7. Et nondum cani nigros laesere capillos,
  8. nec uenit tardo curua senecta pede:
  9. natalem primo nostrum uidere parentes,
  10. cum cecidit fato consul uterque pari.
  11. Quid fraudare iuuat uitem crescentibus uuis
  12. et modo nata mala uellere poma manu?
  13. Parcite, pallentes undas quicumque tenetis
  14. duraque sortiti tertia regna dei.
  15. Elysios olim liceat cognoscere campos
  16. Lethaeamque ratem Cimmeriosque lacus,
  17. cum mea rugosa pallebunt ora senecta
  18. et referam pueris tempora prisca senex.
  19. Atque utinam uano nequiquam terrear aestu!
  20. Languent ter quinos sed mea membra dies.