Elegiae

Tibullus

Tibullus. Aliorumque carminum libri tres. Postgate, J. P. (John Percival), editor. Oxford: Scriptorum classicorum bibliotheca Oxoniensis, 1915.

  1. Atque utinam uano nequiquam terrear aestu!
  2. Languent ter quinos sed mea membra dies.
  3. At uobis Tuscae celebrantur numina lymphae
  4. et facilis lenta pellitur unda manu.
  5. Viuite felices, memores et uiuite nostri,
  6. siue erimus seu nos fata fuisse uelint.
  7. Interea nigras pecudes promittite Diti
  8. et niuei lactis pocula mixta mero.
  1. Candide Liber, ades — sic sit tibi mystica uitis
  2. semper, sic hedera tempora uincta feras —
  3. aufer et, ipse, meum, pariter medicande, dolorem:
  4. saepe tuo cecidit munere uictus amor.
  5. Care puer, madeant generoso pocula baccho,
  6. et nobis prona funde Falerna manu.
  7. Ite procul durum curae genus, ite labores;
  8. fulserit hic niueis Delius alitibus.
  9. Vos modo proposito dulces faueatis amici,
  10. neue neget quisquam me duce se comitem,
  11. aut si quis uini certamen mite recusat,
  12. fallat eum tecto cara puella dolo.