Elegiae

Tibullus

Tibullus. Aliorumque carminum libri tres. Postgate, J. P. (John Percival), editor. Oxford: Scriptorum classicorum bibliotheca Oxoniensis, 1915.

  1. Haec alii cupiant; liceat mihi paupere cultu
  2. securo cara coniuge posse frui.
  3. Adsis et timidis faueas, Saturnia, uotis,
  4. et faueas concha, Cypria, uecta tua.
  5. Aut si fata negant reditum tristesque sorores,
  6. stamina quae ducunt quaeque futura neunt,
  7. me uocet in uastos amnes nigramque paludem
  8. diues in ignaua luridus Orcus aqua.
  1. Di meliora ferant, nec sint mihi somnia uera,
  2. quae tulit hesterna pessima nocte quies.
  3. Ite procul uani falsique auertite uisus,
  4. desinite in nobis quaerere uelle fidem.