Elegiae

Tibullus

Tibullus. Aliorumque carminum libri tres. Postgate, J. P. (John Percival), editor. Oxford: Scriptorum classicorum bibliotheca Oxoniensis, 1915.

  1. a miseri, quos hic grauiter deus urget! at ille
  2. felix, cui placidus leniter adflat Amor.
  3. sancte, ueni dapibus festis, sed pone sagittas
  4. et procul ardentes hinc precor abde faces.
  5. uos celebrem cantate deum pecorique uocate
  6. uoce: palam pecori, clam sibi quisque uocet.
  7. aut etiam sibi quisque palam: nam rurba iocosa
  8. obstrepit et Phrygio tibia curua sono.
  9. ludite: iam Nox iungit equos, currumque sequuntur
  10. matris lasciuo sidera fulua choro,
  11. postque uenit tacitus furuis circumdatus alis
  12. Somnus et incerto Somnia nigra pede.
  1. Dicamus bona uerba: uenit Natalis ad aras:
  2. quisquis ades, lingua, uir mulierque, faue.
  3. urantur pia tura focis, urantur odores
  4. quos tener e terra diuite mittit Arabs.
  5. ipse suos Genius adsit uisurus honores,
  6. cui decorent sanctas mollia serta comas.
  7. illius puro destillent tempora nardo,
  8. atque satur libo sit madeatque mero,