Elegiae

Tibullus

Tibullus. Aliorumque carminum libri tres. Postgate, J. P. (John Percival), editor. Oxford: Scriptorum classicorum bibliotheca Oxoniensis, 1915.

  1. Hanc volitent animae circum sua fata querentes
  2. Semper et e tectis strix violenta canat;
  3. Ipsa fame stimulante furens herbasque sepulcris
  4. Quaerat et a saevis ossa relicta lupis,
  5. Currat et inguinibus nudis ululetque per urbes,
  6. Post agat e triviis aspera turba canum.
  7. Eveniet: dat signa deus; sunt numina amanti,
  8. Saevit et iniusta lege relicta Venus.
  9. At tu quam primum sagae praecepta rapacis
  10. Desere, nam donis vincitur omnis amor.
  11. Pauper erit praesto semper, te pauper adibit
  12. Primus et in tenero fixus erit latere,
  13. Pauper in angusto fidus comes agmine turbae
  14. Subicietque manus efficietque viam,
  15. Pauper ad occultos furtim deducet amicos
  16. Vinclaque de niveo detrahet ipse pede.
  17. Heu canimus frustra, nec verbis victa patescit
  18. Ianua, sed plena est percutienda manu.
  19. At tu, qui potior nunc es, mea fata timeto:
  20. Versatur celeri Fors levis orbe rotae.