Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. sin aliquem uultusque meus saetaeque leonis
  2. terrent et Libyco sole perusta coma,
  3. idem ego Sidonia feci seruilia palla
  4. officia et Lydo pensa diurna colo,
  5. mollis et hirsutum cepit mihi fascia pectus,
  6. et manibus duris apta puella fui.’
  7. talibus Alcides; at talibus alma sacerdos
  8. puniceo canas stamine uincta comas:
  9. ‘parce oculis, hospes, lucoque abscede uerendo;
  10. cede agedum et tuta limina linque fuga.
  11. interdicta uiris metuenda lege piatur
  12. quae se summota uindicat ara casa.
  13. magno Tiresias aspexit Pallada uates,
  14. fortia dum posita Gorgone membra lauat.