Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. audistisne aliquem, tergo qui sustulit orbem?
  2. ille ego sum: Alciden terra recepta uocat.
  3. quis facta Herculeae non audit fortia clauae
  4. et numquam ad uastas irrita tela feras,
  5. atque uni Stygias homini luxisse tenebras?
  6. accipit: haec fesso uix mihi terra patet.
  7. quodsi Iunoni sacrum faceretis amarae,
  8. non clausisset aquas ipsa nouerca suas.
  9. sin aliquem uultusque meus saetaeque leonis
  10. terrent et Libyco sole perusta coma,
  11. idem ego Sidonia feci seruilia palla
  12. officia et Lydo pensa diurna colo,
  13. mollis et hirsutum cepit mihi fascia pectus,
  14. et manibus duris apta puella fui.’
  15. talibus Alcides; at talibus alma sacerdos
  16. puniceo canas stamine uincta comas:
  17. ‘parce oculis, hospes, lucoque abscede uerendo;
  18. cede agedum et tuta limina linque fuga.
  19. interdicta uiris metuenda lege piatur
  20. quae se summota uindicat ara casa.