Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. huc ruit in siccam congesta puluere barbam,
  2. et iacit ante fores uerba minora deo:
  3. ‘uos precor, o luci sacro quae luditis antro,
  4. pandite defessis hospita fana uiris.
  5. fontis egens erro circaque sonantia lymphis;
  6. et caua succepto flumine palma sat est.
  7. audistisne aliquem, tergo qui sustulit orbem?
  8. ille ego sum: Alciden terra recepta uocat.
  9. quis facta Herculeae non audit fortia clauae
  10. et numquam ad uastas irrita tela feras,
  11. atque uni Stygias homini luxisse tenebras?
  12. accipit: haec fesso uix mihi terra patet.
  13. quodsi Iunoni sacrum faceretis amarae,
  14. non clausisset aquas ipsa nouerca suas.
  15. sin aliquem uultusque meus saetaeque leonis
  16. terrent et Libyco sole perusta coma,
  17. idem ego Sidonia feci seruilia palla
  18. officia et Lydo pensa diurna colo,
  19. mollis et hirsutum cepit mihi fascia pectus,
  20. et manibus duris apta puella fui.’