Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. spargite me lymphis, carmenque recentibus aris
  2. tibia Mygdoniis libet eburna cadis.
  3. ite procul fraudes, alio sint aere noxae:
  4. pura nouum uati laurea mollit iter.
  5. Musa, Palatini referemus Apollinis aedem:
  6. res est, Calliope, digna fauore tuo.
  7. Caesaris in nomen ducuntur carmina: Caesar
  8. dum canitur, quaeso, Iuppiter ipse uaces!