Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. experiar somnum, de te mihi somnia quaeram:
  2. fac uenias oculis umbra benigna meis.’
  3. dixit, et incerto permisit bracchia somno,
  4. nescia se furiis accubuisse nouis.
  5. nam Vesta, Iliacae felix tutela fauillae,
  6. culpam alit et plures condit in ossa faces.
  7. illa ruit, qualis celerem prope Thermodonta
  8. Strymonis abscisso fertur aperta sinu.
  9. urbi festus erat (dixere Parilia patres),
  10. hic primus coepit moenibus esse dies,
  11. annua pastorum conuiuia, lusus in urbe,
  12. cum pagana madent fercula diuitiis,
  13. cumque super raros faeni flammantis aceruos
  14. traicit immundos ebria turba pedes.
  15. Romulus excubias decreuit in otia i
  16. atque intermissa castra silere tuba.
  17. hoc Tarpeia suum tempus rata conuenit hostem:
  18. pacta ligat, pactis ipsa futura comes.