Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. quantum ego sum Ausoniis crimen factura puellis,
  2. improba uirgineo lecta ministra foco!
  3. Pallados exstinctos si quis mirabitur ignis,
  4. ignoscat: lacrimis spargitur ara meis.
  5. cras, ut rumor ait, tota potabitur urbe:
  6. tu cape spinosi rorida terga iugi.
  7. lubrica tota uia est et perfida: quippe tacentis
  8. fallaci celat limite semper aquas.
  9. o utinam magicae nossem cantamina Musae!
  10. haec quoque formoso lingua tulisset opem.
  11. te toga picta decet, non quem sine matris honore
  12. nutrit inhumanae dura papilla lupae.
  13. hic, hospes, patria metuar regina sub aula?
  14. dos tibi non humilis prodita Roma uenit.