Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. ille equus, ille meos in castra reponet amores,
  2. cui Tatius dextras collocat ipse iubas!
  3. quid mirum in patrios Scyllam saeuisse capillos,
  4. candidaque in saeuos inguina uersa canis?
  5. prodita quid mirum fraterni cornua monstri,
  6. cum patuit lecto stamine torta uia?
  7. quantum ego sum Ausoniis crimen factura puellis,
  8. improba uirgineo lecta ministra foco!
  9. Pallados exstinctos si quis mirabitur ignis,
  10. ignoscat: lacrimis spargitur ara meis.
  11. cras, ut rumor ait, tota potabitur urbe:
  12. tu cape spinosi rorida terga iugi.