Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. suppetat hic, piscis calamo praedabor, et ibo
  2. mundus demissis institor in tunicis.
  3. pastorem ad baculum possum curuare uel idem
  4. sirpiculis medio puluere ferre rosam.
  5. nam quid ego adiciam, de quo mihi maxima fama est,
  6. hortorum in manibus dona probata meis?
  7. caeruleus cucumis tumidoque cucurbita uentre
  8. me notat et iunco brassica uincta leui;
  9. nec flos ullus hiat pratis, quin ille decenter
  10. impositus fronti langueat ante meae.
  11. at mihi, quod formas unus uertebar in omnis,
  12. nomen ab euentu patria lingua dedit;
  13. et tu, Roma, meis tribuisti praemia Tuscis,
  14. (unde hodie Vicus nomina Tuscus habet),
  15. tempore quo sociis uenit Lycomedius armis
  16. atque Sabina feri contudit arma Tati.
  17. uidi ego labentis acies et tela caduca,
  18. atque hostis turpi terga dedisse fugae.
  19. sed facias, diuum Sator, ut Romana per aeuum
  20. transeat ante meos turba togata pedes.