Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. arma tuli quondam et, memini, laudabar in illis:
  2. corbis et imposito pondere messor eram.
  3. sobrius ad lites: at cum est imposta corona,
  4. clamabis capiti uina subisse meo.
  5. cinge caput mitra, speciem furabor Iacchi;
  6. furabor Phoebi, si modo plectra dabis.
  7. cassibus impositis uenor: sed harundine sumpta
  8. fautor plumoso sum deus aucupio.
  9. est etiam aurigae species Vertumnus et eius
  10. traicit alterno qui leue pondus equo.
  11. suppetat hic, piscis calamo praedabor, et ibo
  12. mundus demissis institor in tunicis.
  13. pastorem ad baculum possum curuare uel idem
  14. sirpiculis medio puluere ferre rosam.
  15. nam quid ego adiciam, de quo mihi maxima fama est,
  16. hortorum in manibus dona probata meis?