Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. prima mihi uariat liuentibus uua racemis,
  2. et coma lactenti spicea fruge tumet;
  3. hic dulcis cerasos, hic autumnalia pruna
  4. cernis et aestiuo mora rubere die;
  5. insitor hic it pomosa uota corona,
  6. cum pirus inuito stipite mala tulit.
  7. mendax fama, noces: alius mihi nominis index:
  8. de se narranti tu modo crede deo.
  9. opportuna mea est cunctis natura figuris:
  10. in quamcumque uoles uerte, decorus ero.
  11. indue me Cois, fiam non dura puella:
  12. meque uirum sumpta quis neget esse toga?
  13. da falcem et torto frontem mihi comprime faeno:
  14. iurabis nostra gramina secta manu.
  15. arma tuli quondam et, memini, laudabar in illis:
  16. corbis et imposito pondere messor eram.
  17. sobrius ad lites: at cum est imposta corona,
  18. clamabis capiti uina subisse meo.