Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. nec te, dulce caput, mater Scribonia, laesi:
  2. in me mutatum quid nisi fata uelis?
  3. maternis laudor lacrimis urbisque querelis,
  4. defensa et gemitu Caesaris ossa mea.
  5. ille sua nata dignam uixisse sororem
  6. increpat, et lacrimas uidimus ire deo.
  7. et tamen emerui generosos uestis honores
  8. nec mea de sterili facta rapina domo.
  9. tu, Lepide, et tu, Paulle, meum post fata leuamen:
  10. condita sunt uestro lumina nostra sinu.
  11. uidimus et fratrem sellam geminasse curulem,
  12. consule quo, festo tempore, rapta soror.
  13. filia, tu specimen censurae nata paternae,
  14. fac teneas unum nos imitata uirum.
  15. et serie fulcite genus: mihi cumba uolenti
  16. itur aucturis tot mea facta meis.
  17. haec est feminei merces extrema triumphi,
  18. laudat ubi emeritum libera fama rogum.
  19. nunc tibi commendo communia pignora natos:
  20. haec cura et cineri spirat inusta meo.