Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. aut si quis posita iudex sedet Aeacus urna,
  2. in mea sortita uindicet ossa pila:
  3. assideant fratres, iuxta et Minoida sellam
  4. Eumenidum intento turba seuera foro:
  5. Sisyphe, mole uaces; taceant Ixionis orbes,
  6. fallax Tantaleus corripiare liquor;
  7. Cerberus et nullas hodie petat improbus umbras;
  8. et iaceat tacita laxa catena sera.
  9. ipsa loquor pro me: si fallo, poena sororum
  10. infelix umeros urgeat urna meos.
  11. si cui fama fuit per auita tropaea decori,
  12. Afra Numantinos regna loquuntur auos:
  13. altera maternos exaequat turba Libones,
  14. et domus est titulis utraque fulta suis.
  15. mox, ubi iam facibus cessit praetexta maritis,
  16. uinxit et acceptas altera uitta comas,
  17. iungor, Paulle, tuo sic discessura cubili:
  18. in lapide hoc uni nupta fuisse legar.
  19. testor maiorum cineres tibi, Roma, colendos,
  20. sub quorum titulis, Africa, tunsa iaces,