Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. idem ego, cum Cinarae traheret Lucina dolores,
  2. et facerent uteri pondera lenta moram,
  3. Iunonis facito uotum impetrabile dixi:
  4. illa parit: libris est data palma meis!
  5. hoc neque harenosum Libyae Iouis explicat antrum,
  6. aut sibi commissos fibra locuta deos,
  7. aut si quis motas cornicis senserit alas,
  8. umbraue quae magicis mortua prodit aquis:
  9. aspicienda uia est caeli uerusque per astra
  10. trames, et ab zonis quinque petenda fides.
  11. exemplum graue erit Calchas: namque Aulide it
  12. ille bene haerentis ad pia saxa ratis;
  13. idem Agamemnoniae ferrum ceruice puellae
  14. tinxit, et Atrides uela cruenta dedit;
  15. nec rediere tamen Danai: tu diruta fletum
  16. supprime et Euboicos respice, Troia, sinus!
  17. Nauplius ultores sub noctem porrigit ignis,
  18. et natat exuuiis Graecia pressa suis.
  19. uictor Oiliade, rape nunc et dilige uatem,
  20. quam uetat auelli ueste Minerua sua!