Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. haec urant pueros, haec urant scripta puellas
  2. meque deum clament et mihi sacra ferant!
  3. te duce vel Iovis arma canam caeloque minantem
  4. Coeum et Phlegraeis Eurymedonta iugis;
  5. eductosque pares silvestri ex ubere reges,
  6. ordiar et caeso moenia firma Remo,
  7. celsaque Romanis decerpta palatia tauris,
  8. crescet et ingenium sub tua iussa meum;
  9. prosequar et currus utroque ab litore ovantis,
  10. Parthorum astutae tela remissa fugae,
  11. claustraque Pelusi Romano subruta ferro,
  12. Antonique gravis in sua fata manus.