Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. his ego tormentis animi sum verus haruspex,
  2. has didici certo saepe in amore notas.
  3. non est certa fides, quam non in iurgia vertas:
  4. hostibus eveniat lenta puella meis.
  5. in morso aequales videant mea vulnera collo:
  6. me doceat livor mecum habuisse meam.
  7. aut in amore dolere volo aut audire dolentem,
  8. sive meas lacrimas sive videre tuas,
  9. tecta superciliis si quando verba remittis,
  10. aut tua cum digitis scripta silenda notas.
  11. odi ego quos numquam pungunt suspiria somnos:
  12. semper in irata pallidus esse velim.
  13. dulcior ignis erat Paridi, cum Graia per arma
  14. Tynaridi poterat gaudia ferre suae: