Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. reddite corpus, aquae! positast in gurgite vita;
  2. Paetum sponte tua, vilis harena, tegas;
  3. et quotiens Paeti transibit nauta sepulcrum,
  4. dicat 'et audaci tu timor esse potes.'
  5. ite, rates curvate et leti texite causas:
  6. ista per humanas mors venit acta manus.
  7. terra parum fuerat fatis, adiecimus undas:
  8. fortunae miseras auximus arte vias.
  9. ancora te teneat, quem non tenuere penates?
  10. quid meritum dicas, cui sua terra parumst?
  11. ventorumst, quodcumque paras: haud ulla carina
  12. consenuit, fallit portus et ipse fidem.
  13. nam tibi nocturnis ad saxa ligata procellis
  14. omnia detrito vincula fune cadunt.