Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. portabat sanctos alveus ille viros.
  2. o centum aequoreae Nereo genitore puellae,
  3. et tu, materno tacta dolore, Theti;
  4. vos decuit lasso supponere bracchia mento:
  5. non poterat vestras ille gravare manus.
  6. reddite corpus, aquae! positast in gurgite vita;
  7. Paetum sponte tua, vilis harena, tegas;
  8. et quotiens Paeti transibit nauta sepulcrum,
  9. dicat 'et audaci tu timor esse potes.'
  10. ite, rates curvate et leti texite causas:
  11. ista per humanas mors venit acta manus.
  12. terra parum fuerat fatis, adiecimus undas:
  13. fortunae miseras auximus arte vias.
  14. ancora te teneat, quem non tenuere penates?
  15. quid meritum dicas, cui sua terra parumst?
  16. ventorumst, quodcumque paras: haud ulla carina
  17. consenuit, fallit portus et ipse fidem.
  18. nam tibi nocturnis ad saxa ligata procellis
  19. omnia detrito vincula fune cadunt.