Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. hic erat affixis viridis spelunca lapillis,
  2. pendebantque cavis tympana pumicibus,
  3. orgia Musarum et Sileni patris imago
  4. fictilis et calami, Pan Tegeaee, tui;
  5. et Veneris dominae volucres, mea turba, columbae
  6. tingunt Gorgoneo punica rostra lacu;
  7. diversaeque novem sortitae iura Puellae
  8. exercent teneras in sua dona manus:
  9. haec hederas legit in thyrsos, haec carmina nervis
  10. aptat, at illa manu texit utraque rosam.