Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. hic, Anio Tiburne, fluis, Clitumnus ab Umbro
  2. tramite, et aeternum Marcius umor opus,
  3. Albanus lacus et foliis Nemorensis abundans,
  4. potaque Pollucis nympha salubris equo.
  5. at non squamoso labuntur ventre cerastae,
  6. Itala portentis nec furit unda novis;
  7. non hic Andromedae resonant pro matre catenae,
  8. nec tremis Ausonias, Phoebe fugate, dapes,
  9. nec cuiquam absentes arserunt in caput ignes
  10. exitium nato matre movente suo;
  11. Penthea non saevae venantur in arbore Bacchae,
  12. nec solvit Danaas subdita cerva rates;
  13. cornua nec valuit curvare in paelice Iuno
  14. aut faciem turpi dedecorare bove;