Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. ah quotiens famulam pensis oneravit iniquis,
  2. et caput in dura ponere iussit humo!
  3. saepe illam immundis passast habitare tenebris,
  4. vilem ieiunae saepe negavit aquam.
  5. Iuppiter, Antiopae nusquam succurris habenti
  6. tot mala? corrumpit dura catena manus.
  7. si deus es, tibi turpe tuam servire puellam:
  8. invocet Antiope quem nisi vincta Iovem?
  9. sola tamen, quaecumque aderant in corpore vires,
  10. regalis manicas rupit utraque manu.
  11. inde Cithaeronis timido pede currit in arces.
  12. nox erat, et sparso triste cubile gelu.