Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. haec etiam clausas expugnant arma pudicas
  2. quaeque gerunt fastus, Icarioti, tuos.
  3. matrona incedit census induta nepotum
  4. et spolia opprobrii nostra per ora trahit.
  5. nullast poscendi, nullast reverentia dandi,
  6. aut si quast, pretio tollitur ipsa mora.
  7. felix Eois lex funeris una maritis,
  8. quos Aurora suis rubra colorat equis!
  9. namque ubi mortifero iactast fax ultima lecto,
  10. uxorum fusis stat pia turba comis,
  11. et certamen habent leti, quae viva sequatur
  12. coniugium: pudor est non licuisse mori.
  13. ardent victrices et flammae pectora praebent,
  14. imponuntque suis ora perusta viris.