Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. hoc genus infidum nuptarum, hic nulla puella
  2. nec fida Euadne nec pia Penelope.
  3. felix agrestum quondam pacata iuventus,
  4. divitiae quorum messis et arbor erant!
  5. illis munus erat decussa Cydonia ramo,
  6. et dare puniceis plena canistra rubis,
  7. nunc violas tondere manu, nunc mixta referre
  8. lilia vimineos lucida per calathos,
  9. et portare suis vestitas frondibus uvas
  10. aut variam plumae versicoloris avem.
  11. his tum blanditiis furtiva per antra puellae
  12. oscula silvicolis empta dedere viris.