Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. tantine ulla fuit spoliati gloria Parthi,
  2. ne faceres Galla multa rogante tua?
  3. si fas est, omnes pariter pereatis avari,
  4. et quisquis fido praetulit arma toro!
  5. tu tamen iniecta tectus, vesane, lacerna
  6. potabis galea fessus Araxis aquam.
  7. illa quidem interea fama tabescet inani,
  8. haec tua ne virtus fiat amara tibi,
  9. neve tua Medae laetentur caede sagittae,
  10. ferreus armato neu cataphractus equo,
  11. neve aliquid de te flendum referatur in urna:
  12. sic redeunt, illis qui cecidere locis.