Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. ista ego praeterita iactavi verba iuventa:
  2. tu nunc exemplo disce timere meo.
  3. Colchis flagrantis adamantina sub iuga tauros
  4. egit et armigera proelia sevit humo,
  5. custodisque feros clausit serpentis hiatus,
  6. iret ut Aesonias aurea lana domos.
  7. ausa ferox ab equo quondam oppugnare sagittis
  8. Maeotis Danaum Penthesilea rates;
  9. aurea cui postquam nudavit cassida frontem,
  10. vicit victorem candida forma virum.
  11. Omphale in tantum formae processit honorem,
  12. Lydia Gygaeo tincta puella lacu,
  13. ut, qui pacato statuisset in orbe columnas,
  14. tam dura traheret mollia pensa manu.
  15. Persarum statuit Babylona Semiramis urbem,
  16. ut solidum cocto tolleret aggere opus,
  17. et duo in adversum mitti per moenia currus
  18. nec possent tacto stringere ab axe latus;
  19. duxit et Euphraten medium, quam condidit, arcis,
  20. iussit et imperio subdere Bactra caput.