Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. aspiciam nullos hodierna luce dolentis,
  2. et Niobae lacrimas supprimat ipse lapis;
  3. alcyonum positis requiescant ora querelis;
  4. increpet absumptum nec sua mater Ityn.
  5. tuque, o cara mihi, felicibus edita pennis,
  6. surge et poscentis iusta precare deos.
  7. at primum pura somnum tibi discute lympha,
  8. et nitidas presso pollice finge comas;
  9. dein qua primum oculos cepisti veste Properti
  10. indue, nec vacuum flore relinque caput;
  11. et pete, qua polles, ut sit tibi forma perennis,
  12. inque meum semper stent tua regna caput.