Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. transeat hic sine nube dies, stent aere venti,
  2. ponat et in sicco molliter unda minas.
  3. aspiciam nullos hodierna luce dolentis,
  4. et Niobae lacrimas supprimat ipse lapis;
  5. alcyonum positis requiescant ora querelis;
  6. increpet absumptum nec sua mater Ityn.
  7. tuque, o cara mihi, felicibus edita pennis,
  8. surge et poscentis iusta precare deos.
  9. at primum pura somnum tibi discute lympha,
  10. et nitidas presso pollice finge comas;
  11. dein qua primum oculos cepisti veste Properti
  12. indue, nec vacuum flore relinque caput;
  13. et pete, qua polles, ut sit tibi forma perennis,
  14. inque meum semper stent tua regna caput.