Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. quid frustra immissis mecum certatis habenis?
  2. non datur ad Musas currere lata via.
  3. multi, Roma, tuas laudes annalibus addent,
  4. qui finem imperii Bactra futura canent.
  5. sed, quod pace legas, opus hoc de monte Sororum
  6. detulit intacta pagina nostra via.
  7. mollia, Pegasides, date vestro serta poetae:
  8. non faciet capiti dura corona meo.
  9. at mihi quod vivo detraxerit invida turba,
  10. post obitum duplici faenore reddet Honos;
  11. omnia post obitum fingit maiora vetustas:
  12. maius ab exsequiis nomen in ora venit.