Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. obstipui: non illa mihi formosior umquam
  2. visa, neque ostrina cum fuit in tunica,
  3. ibat et hinc castae narratum somnia Vestae,
  4. neu sibi neve mihi quae nocitura forent:
  5. talis visa mihi somno dimissa recenti.
  6. heu quantum per se candida forma valet!
  7. 'Quid tu matutinus,' ait 'speculator amicae,
  8. me similem vestris moribus esse putas?
  9. non ego tam facilis: sat erit mihi cognitus unus,
  10. vel tu vel si quis verior esse potest.
  11. apparent non ulla toro vestigia presso,
  12. signa volutantis nec iacuisse duos.
  13. aspice ut in toto nullus mihi corpore surgat
  14. spiritus admisso notus adulterio.'
  15. dixit, et opposita propellens savia dextra
  16. prosilit in laxa nixa pedem solea.
  17. sic ego tam sancti custos deludor amoris:
  18. ex illo felix nox mihi nulla fuit.
  1. QVO fugis a demens? nulla est fuga: tu licet usque
  2. ad Tanain fugias, usque sequetur Amor.