Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. nullus erit castis iuvenis corruptor in agris,
  2. qui te blanditiis non sinat esse probam;
  3. nulla neque ante tuas orietur rixa fenestras,
  4. nec tibi clamatae somnus amarus erit.
  5. sola eris et solos spectabis, Cynthia, montis
  6. et pecus et finis pauperis agricolae.
  7. illic te nulli poterunt corrumpere ludi,
  8. fanaque peccatis plurima causa tuis.