Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. aetas prima canat Veneres, extrema tumultus:
  2. bella canam, quando scripta puella mea est.
  3. nunc volo subducto gravior procedere vultu,
  4. nunc aliam citharam me mea Musa docet.
  5. surge, anima, ex humili; iam, carmine, sumite vires;
  6. Pierides, magni nunc erit oris opus.
  7. iam negat Euphrates equitem post terga tueri
  8. Parthorum et Crassos se tenuisse dolet:
  9. India quin, Auguste, tuo dat colla triumpho,
  10. et domus intactae te tremit Arabiae;
  11. et si qua extremis tellus se subtrahit oris,
  12. sentiat illa tuas postmodo capta manus!
  13. haec ego castra sequar; vates tua castra canendo
  14. magnus ero: servent hunc mihi fata diem!
  15. at caput in magnis ubi non est tangere signis,
  16. ponitur hac imos ante corona pedes;
  17. sic nos nunc, inopes laudis conscendere carmen,
  18. pauperibus sacris vilia tura damus.
  19. nondum etiam Ascraeos norunt mea carmina fontis,
  20. sed modo Permessi flumine lavit Amor.