Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. laus erit: in magnis et voluisse sat est.
  2. aetas prima canat Veneres, extrema tumultus:
  3. bella canam, quando scripta puella mea est.
  4. nunc volo subducto gravior procedere vultu,
  5. nunc aliam citharam me mea Musa docet.
  6. surge, anima, ex humili; iam, carmine, sumite vires;
  7. Pierides, magni nunc erit oris opus.
  8. iam negat Euphrates equitem post terga tueri
  9. Parthorum et Crassos se tenuisse dolet:
  10. India quin, Auguste, tuo dat colla triumpho,
  11. et domus intactae te tremit Arabiae;
  12. et si qua extremis tellus se subtrahit oris,
  13. sentiat illa tuas postmodo capta manus!
  14. haec ego castra sequar; vates tua castra canendo
  15. magnus ero: servent hunc mihi fata diem!
  16. at caput in magnis ubi non est tangere signis,
  17. ponitur hac imos ante corona pedes;
  18. sic nos nunc, inopes laudis conscendere carmen,
  19. pauperibus sacris vilia tura damus.