Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. iam libet et fortis memorare ad proelia turmas
  2. et Romana mei dicere castra ducis.
  3. quod si deficiant vires, audacia certe
  4. laus erit: in magnis et voluisse sat est.
  5. aetas prima canat Veneres, extrema tumultus:
  6. bella canam, quando scripta puella mea est.
  7. nunc volo subducto gravior procedere vultu,
  8. nunc aliam citharam me mea Musa docet.
  9. surge, anima, ex humili; iam, carmine, sumite vires;
  10. Pierides, magni nunc erit oris opus.
  11. iam negat Euphrates equitem post terga tueri
  12. Parthorum et Crassos se tenuisse dolet:
  13. India quin, Auguste, tuo dat colla triumpho,
  14. et domus intactae te tremit Arabiae;
  15. et si qua extremis tellus se subtrahit oris,
  16. sentiat illa tuas postmodo capta manus!
  17. haec ego castra sequar; vates tua castra canendo
  18. magnus ero: servent hunc mihi fata diem!