Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. et si qua extremis tellus se subtrahit oris,
  2. sentiat illa tuas postmodo capta manus!
  3. haec ego castra sequar; vates tua castra canendo
  4. magnus ero: servent hunc mihi fata diem!
  5. at caput in magnis ubi non est tangere signis,
  6. ponitur hac imos ante corona pedes;
  7. sic nos nunc, inopes laudis conscendere carmen,
  8. pauperibus sacris vilia tura damus.
  9. nondum etiam Ascraeos norunt mea carmina fontis,
  10. sed modo Permessi flumine lavit Amor.