Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. surge, anima, ex humili; iam, carmine, sumite vires;
  2. Pierides, magni nunc erit oris opus.
  3. iam negat Euphrates equitem post terga tueri
  4. Parthorum et Crassos se tenuisse dolet:
  5. India quin, Auguste, tuo dat colla triumpho,
  6. et domus intactae te tremit Arabiae;
  7. et si qua extremis tellus se subtrahit oris,
  8. sentiat illa tuas postmodo capta manus!
  9. haec ego castra sequar; vates tua castra canendo
  10. magnus ero: servent hunc mihi fata diem!
  11. at caput in magnis ubi non est tangere signis,
  12. ponitur hac imos ante corona pedes;
  13. sic nos nunc, inopes laudis conscendere carmen,
  14. pauperibus sacris vilia tura damus.
  15. nondum etiam Ascraeos norunt mea carmina fontis,
  16. sed modo Permessi flumine lavit Amor.