Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. tarda Philoctetae sanavit crura Machaon,
  2. Phoenicis Chiron lumina Phillyrides,
  3. et deus exstinctum Cressis Epidaurius herbis
  4. restituit patriis Androgeona focis,
  5. Mysus et Haemonia iuvenis qua cuspide vulnus
  6. senserat, hac ipsa cuspide sensit opem.
  7. hoc si quis vitium poterit mihi demere, s
  8. Tantalea poterit tradere poma manu;
  9. dolia virgineis idem ille repleverit urnis,
  10. ne tenera assidua colla graventur aqua;
  11. idem Caucasia solvet de rupe Promethei
  12. bracchia et a medio pectore pellet avem.
  13. quandocumque igitur vitam mea fata reposcent,
  14. et breve in exiguo marmore nomen ero,
  15. Maecenas, nostrae spes invidiosa iuventae,
  16. et vitae et morti gloria iusta meae,
  17. si te forte meo ducet via proxima busto,
  18. esseda caelatis siste Britanna iugis,
  19. taliaque illacrimans mutae iace verba favillae:
  20. 'Huic misero fatum dura puella fuit.'