Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. nec iam pallorem totiens mirabere nostrum,
  2. aut cur sim toto corpore nullus ego.
  3. nec tibi nobilitas poterit succurrere amanti:
  4. nescit Amor priscis cedere imaginibus.
  5. quod si parva tuae dederis vestigia culpae,
  6. quam cito de tanto nomine rumor eris!
  7. non ego tum potero solacia ferre roganti,
  8. cum mihi nulla mei sit medicina mali;
  9. sed pariter miseri socio cogemur amore
  10. alter in alterius mutua flere sinu.
  11. quare, quid possit mea Cynthia, desine, Galle,
  12. quaerere: non impune illa rogata venit.