Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. et quaecumque voles fugient tibi verba querenti,
  2. nec poteris, qui sis aut ubi, nosse miser!
  3. tum grave servitium nostrae cogere puellae
  4. discere et exclusum quid sit abire domum;
  5. nec iam pallorem totiens mirabere nostrum,
  6. aut cur sim toto corpore nullus ego.
  7. nec tibi nobilitas poterit succurrere amanti:
  8. nescit Amor priscis cedere imaginibus.
  9. quod si parva tuae dederis vestigia culpae,
  10. quam cito de tanto nomine rumor eris!
  11. non ego tum potero solacia ferre roganti,
  12. cum mihi nulla mei sit medicina mali;
  13. sed pariter miseri socio cogemur amore
  14. alter in alterius mutua flere sinu.
  15. quare, quid possit mea Cynthia, desine, Galle,
  16. quaerere: non impune illa rogata venit.
  1. Non ego nunc Hadriae vereor mare noscere tecum,
  2. Tulle, neque Aegaeo ducere vela salo,
  3. cum quo Rhipaeos possim conscendere montes
  4. ulteriusque domos vadere Memnonias;