Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. iam Pandioniae cessit genus Orithyiae:
  2. ah dolor! ibat Hylas, ibat Hamadryasin.
  3. hic erat Arganthi Pege sub vertice montis,
  4. grata domus Nymphis umida Thyniasin,
  5. quam supra nulli pendebant debita curae
  6. roscida desertis poma sub arboribus,
  7. et circum irriguo surgebant lilia prato
  8. candida purpureis mixta papaveribus.
  9. quae modo decerpens tenero pueriliter ungui
  10. proposito florem praetulit officio,
  11. et modo formosis incumbens nescius undis
  12. errorem blandis tardat imaginibus.
  13. tandem haurire parat demissis flumina palmis
  14. innixus dextro plena trahens umero.
  15. cuius ut accensae Dryades candore puellae
  16. miratae solitos destituere choros
  17. prolapsum et leviter facili traxere liquore,
  18. tum sonitum rapto corpore fecit Hylas.
  19. cui procul Alcides ter 'Hyla!' respondet: at illi
  20. nomen ab extremis montibus aura refert.