Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. unde tuos primum repetam, mea Cynthia, fastus?
  2. quod mihi das flendi, Cynthia, principium?
  3. qui modo felicis inter numerabar amantes,
  4. nunc in amore tuo cogor habere notam.
  5. quid tantum merui? quae te mihi crimina mutant?
  6. an nova tristitiae causa puella tuae?
  7. sic mihi te referas, levis, ut non altera nostro
  8. limine formosos intulit ulla pedes.
  9. quamvis multa tibi dolor hic meus aspera debet,
  10. non ita saeva tamen venerit ira mea,
  11. ut tibi sim merito semper furor, et tua flendo
  12. lumina deiectis turpia sint lacrimis.
  13. an quia parva damus mutato signa colore,
  14. et non ulla meo clamat in ore fides?
  15. vos eritis testes, si quos habet arbor amores,
  16. fagus et Arcadio pinus amica deo.
  17. ah quotiens vestras resonant mea verba sub umbras,
  18. scribitur et teneris Cynthia corticibus!
  19. ah tua quot peperit nobis iniuria curas,
  20. quae m tacitis cognita sunt foribus!