Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. sis quodcumque voles, non aliena tamen.
  2. tam tibi ne viles isti videantur ocelli,
  3. per quos saepe mihi credita perfidiast!
  4. hos tu iurabas, si quid mentita fuisses,
  5. ut tibi suppositis exciderent manibus:
  6. et contra magnum potes hos attollere Solem,
  7. nec tremis admissae conscia nequitiae?
  8. quis te cogebat multos pallere colores
  9. et fletum invitis ducere luminibus?
  10. quis ego nunc pereo, similis moniturus amantes
  11. non ullis tutum credere blanditiis.
  1. Quae fueram magnis olim patefacta triumphis,
  2. ianua Patriciae vota Pudicitiae,
  3. cuius inaurati celebrarunt limina currus,
  4. captorum lacrimis umida supplicibus,
  5. nunc ego, nocturnis potorum saucia rixis,
  6. pulsata indignis saepe queror manibus,
  7. et mihi non desunt turpes pendere corollae
  8. semper et exclusi signa iacere faces.
  9. nec possum infamis dominae defendere voces,