Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. vidi ego te toto vinctum languescere collo
  2. et flere iniectis, Galle, diu manibus,
  3. et cupere optatis animam deponere labris,
  4. et quae deinde meus celat, amice, pudor.
  5. non ego complexus potui diducere vestros:
  6. tantus erat demens inter utrosque furor.
  7. non sic Haemonio Salmonida mixtus Enipeo
  8. Taenarius facili pressit amore deus,
  9. nec sic caelestem flagrans amor Herculis Heben
  10. sensit ab Oetaeis gaudia prima rogis.
  11. una dies omnis potuit praecurrere amantes:
  12. nam tibi non tepidas subdidit illa faces,
  13. nec tibi praeteritos passast succedere fastus,
  14. nec sinet: addictum te tuus ardor aget.
  15. nec mirum, cum sit Iove dignae proxima Ledae
  16. et Ledae partu gratior, una tribus;
  17. illa sit Inachiis et blandior heroinis,
  18. illa suis verbis cogat amare Iovem.
  19. tu vero quoniam semel es periturus amore,
  20. utere: non alio limine dignus eras.