De Rerum Natura

Lucretius

-

  1. tum porro locus ac spatium, quod inane vocamus,
  2. si nullum foret, haut usquam sita corpora possent
  3. esse neque omnino quoquam diversa meare;
  4. id quod iam supera tibi paulo ostendimus ante.
  5. praeterea nihil est quod possis dicere ab omni
  6. corpore seiunctum secretumque esse ab inani,
  7. quod quasi tertia sit numero natura reperta.
  8. nam quod cumque erit, esse aliquid debebit id ipsum
  9. augmine vel grandi vel parvo denique, dum sit;
  10. cui si tactus erit quamvis levis exiguusque,
  11. corporis augebit numerum summamque sequetur;
  12. sin intactile erit, nulla de parte quod ullam
  13. rem prohibere queat per se transire meantem,
  14. scilicet hoc id erit, vacuum quod inane vocamus.
  15. Praeterea per se quod cumque erit, aut faciet quid
  16. aut aliis fungi debebit agentibus ipsum
  17. aut erit ut possint in eo res esse gerique.