Carmina

Catullus

Catullus, Gaius Valerius. Carmina. Merrill, Elmer Truesdell, editor. Boston: Ginn, 1893.

  1. proicere optavit potius quam talia Cretam
  2. funera Cecropiae nec funera portarentur.
  3. atque ita nave levi nitens ac lenibus auris
  4. magnanimum ad Minoa venit sedesque superbas.
  5. hunc simul ac cupido conspexit lumine virgo
  6. regia, quam suavis exspirans castus odores
  7. lectulus in molli complexu matris alebat,
  8. quales Eurotae progignunt flumina myrtos
  9. aurave distinctos educit verna colores,
  10. non prius ex illo flagrantia declinavit
  11. lumina quam cuncto concepit corpore flammam
  12. funditus atque imis exarsit tota medullis.
  13. heu misere exagitans immiti corde furores,
  14. sancte puer, curis hominum qui gaudia misces,
  15. quaeque regis Golgos quaeque Idalium frondosum,
  16. qualibus incensam iactastis mente puellam
  17. fluctibus in flavo saepe hospite suspirantem!
  18. quantos illa tulit languenti corde timores,